Геральдычная рада «Пагоня» распрацавала і перадала Аб’яднанню Сілавікоў Беларусі BELPOL геральдычную эмблему.
Апісанне эмблемы:
Эмблема ўяўляе сабой варажскую тарчу з срэбнай аблямоўкай, на якой зверху па абрэзе змешчаны надпіс “BELPOL” чорнага колеру. У чорным полі тарчы змешчаны скіраваны вастрыём уверх срэбны меч. Над лязом мяча срэбраная падкова канцамі ўніз, а над ёй — срэбныя шалі.
Кампазіцыя і падбор сімвалаў на эмблеме ілюструюць агульнае імкненне беларусаў да справядлівасці. Велізарная адказнасць у дасягненні гэтай мэты ўскладзена на праваахоўную і судовую сістэмы вольнай дзяржавы.
Падкова сімвалізуе імкненне да ісціны і пошуку праўды падчас следчых аператыўных мерапрыемстваў і з’яўляецца гістарычным сімвалам паліцэйскіх і судовых ураднікаў Беларусі (падкова — найбольш часты элемент на пячатках возных ВКЛ. Возны — службовая асоба, конны следчы-аператыўнік і адначасова судовы выканаўца), шалі — справядлівасць, меч — пакаранасць за злачынства. Сімвалы, якія складаюць эмблему, у сваёй кампазіцыі адпавядаюць бесстаронняму і дынамічнаму Следству (падкова), справядліваму Суду (шалі), пакаранню праз выкананне прысудаў (меч).
Чорны колер азначае сціпласць, ахвярнасць, пагарду да смерці, чорны колер мела вопратка паліцэйска-судовых ўраднікаў ВКЛ, срэбра ў геральдыцы сімвалізуе чысціню, сумленнасць і пакорнасць.
Дадзеная эмблема будзе выкарыстоўвацца на афіцыйных дакументах арганізацыі.
Мы сардэчна дзякуем радзе Пагоня за праведзеную працу для АСБ BELPOL.
Жыве Беларусь!
